കേരളത്തിലെ എറണാകുളം ജില്ലയിലെ കോതമംഗലം പട്ടണത്തിൽ സ്ഥിതി ചെയ്യുന്ന ഒരു മലങ്കര യാക്കോബായ സുറിയാനി പള്ളിയാണ് മാർ തോമ ചെറിയപള്ളി. മാർത്ത് മറിയം വലിയപള്ളിയിൽ നിന്ന് വേർപിരിഞ്ഞ 18 കുടുംബങ്ങൾ 1455 ൽ സ്ഥാപിച്ചതാണ് ഈ പള്ളിയെന്ന് വിശ്വസിക്കപ്പെടുന്നു. സുറിയാനി ഓർത്തഡോക്സ് മഫ്രിയോനോ ബസേലിയോസ് യൽദോ കോതമംഗലത്ത് എത്തിയതോടെയാണ് ഈ പള്ളി കേരളത്തിൽ പ്രസിദ്ധമായത്. ഈ പള്ളിയിലെ അൾത്താര മുറിയിലാണ് അദ്ദേഹത്തെ അടക്കം ചെയ്തത്.